Category Archives: Videos

ወርኃ(ጾመ) ጽጌ(Video)

የ ሆይ እያሉ ወጣቶች የሚጨፍሩትን ከአገርና ከወቅት ጋራ አዋህደው ቀሲስ አስተርአየ በተለመደው ፈሊጣቸው  በከንሳስ መድኃኔ ዓለም ዓውደ ምህረት ላይ ያቀረቡት ትምህርት ቪዲዮ ተቀርጾ ቀርቧል።

ቀሲስ ባቀረቡት ትምህርታቸው እንደገለጹት፦ በአገራችን በኢትዮጵያ አበባየ ሆይ የሚለውን ጭፍራ ሳይጨፍር፤ ባይጨፍርም ሳይሰማ ያደገ የለም። የቤተ ክርስቲያናችን አባቶች ነገረ መለኮቱን በባህላችን በህይወታችን በታሪካችን ማዋሀዳቸውን ከምናይባቸው ክስተቶች አንዱ አበባየ ሆይ እየተባለ በያመቱ በወጣቶች የሚጨፈረው ነው።

የኢትዮጵያ ኦርቶዶክስ ተዋህዶ ቤተ ክርስቲያናችንን ከሌሎች አብያተ ክርስቲያናት ልዩ የሚያደርጓትም “አበባዬ ሆይ!ለምለም” እና  የመሳሰሉት በየበዓላቱ በወጣቶችና ባዛውንቱ ሁሉም እንደየ እድሜው የሚታዩት  ተሳትፎዎች ናቸው። ወቅቱ የልምላሜ ያበባ ወቅት ነው። ይህ የልጆች አመታዊ ጭፈራ የወቅቱ መቀብያ ነው። ወቅቱን ተንተርሶ በህዝብ የሚታወሰው ወቅት የጽጌ ጾም    ይባላል ።

ጾሙ እመቤታችን ቅድስት ድንግል ማርያም ከጌታችን ጋራ በተሰደደች ጊዜ የደረሰባቸውን መከራ ስደት የምናስታውስበት ወቅት ነው። ከጽጌ ጋራ ለምን እንደተያያዘ እንዲህ ሲሉ በሰፊው ገልጸውታል።  ጾመ ጽጌ ማለት የአበባ ጾም ማለት ነው።  አበባ ከምድር ማህጸን የሚከሰት የምድር ጌጥ፤ የምድር ውበትና የምድር ፍሬ መገኛ ነው። የዚህ ሁሉ ውበት ስብስብና ድምር  የፍጥረት መደምደሚያ ሰውነታች ነው። የቅድስናችን ውበት ሲበከል ሰውነታችንን ማለትም የእመቤታችን ቅድስት ድንግል ሰውነት ቀድሶ አንጽቶ ለበሰው። የክርስቶስ ሰውነት ከመቤታችን የወሰደው የተወሀደው ነው። በመስቀል ላይ ከክርስቶስ አካል የፈሰሰው ውሀና  ደም ከመሬት የተገኘ የዳንበት ጽጌ ረዳ ነው።

ወቅታዊውን ችግር ለማንጸባረቅም የሚከተለውን ተናግረዋል። “አንተ አፈር ነህ፤ ወደ አፈርም ትመለሳለህ” ተብለን በልደት ወደዚህ ዓለም የመጣንባትና  ተመልሰን የምንገባባት የመሬታችን የኢትዮጵያ ደም ግባት  የአበባዋና የውበቷ  መፍለቂያ ገባር ወንዞችን የሚሰበስበው ዓባይ ወይም  ጣና ነው። አባይ ከደረቀ የኢትዮጵያ ልምላሜ ይጠወልጋል። አበባነቷም ይረግፋል። የእናት አገራችን አበባነቷ እንዳይረግፍ በሚደረገው መታደግ እንትባበር ዘንድ ፈጣሪ እንዲረዳን እንጸልይ“ ካሉ በኋላ፤ በቤተ ክርስቲያናች ትውፊት የሚቀርበው ትምህርትና ጸሎት ከህዝብና ካገር ነባራዊ ሁኔታ  ተበጥሶ፤ ተቆርጦና በወቅቶች ከሚከሰቱ ነገሮች ሁሉ ተለይቶ የሚቀርብ  አይደለም ብለው፤ ”ደምን በመአዛ መተካት ስህተት ነው” ብለው “በደም ፋንታ መዓዛ መባል አለበት” ተብሎ በስህተት ተነገረ የሚባለውም እንዲታረም እግር መንገዳቸውንም በማሳሰብ፤  በከንሳስ መድኃኔ ዓለም ዓውደ  ምህረት ላይ ያቀረቡትን ዓመታዊ ትምህርት ይጠቅማል ብለን ስለገመትን ቪዲዮውን ከዚህ በታች አቅርበንላችኋል።

 

በመለኮቱ የወረደው ክርስቶስ፤ የተዋረደውን ሰውነት ያሳርገው ዘንድ በለበሰው ሰውነት አረገ(Video)

በመለኮቱ የወረደው ክርስቶስ፤ የተዋረደውን ሰውነት ያሳርገው ዘንድ በለበሰው ሰውነት አረገ

ትውልድን ከትውልድ፣ ዘመንን ከዘመን፣ ክስተትን ከክስተት፣ ያለፈውን ካለው፣እያነጻጸረ ዘመኑን እየቃኘ የሚያስቃኝ “በመለኮቱ የወረደው ክርስቶስ፤ የተዋረደውን ሰውነት ያሳርገው ዘንድ በለበሰው ሰውነት አረገ” በሚል ርእስ ካንሳስ በሚገኘው መድኃኔዓለም የኢትዮጵያ ኦርቶዶክስ ተዋህዶ ቤተክርስቲያን በሚያገለግሉት ታላቁ ሊቅ ቀሲስ አስተርአየ ጽጌ የቀረበ ትምህርተ ወንጌል ነው። ከዕርገት እስከ በዓለ ሐምሳ ያለው ጊዜ የጌታችንንና መድኃኒታችን ኢየሱስ ክርስቶስ ትንሳኤው፣ እርገቱና ዳግም መምጣቱ የሚነገርበት ጊዜ ስለሆነ ይህ ቀሲስ አስተርአየ የሰጡት ትምህርተ ወንጌል ወቅታዊነቱን የጠበቀ ነው። ትምህርተ ወንጌሉ በኦርቶዶክስ ተዋህዶ ክርስትና ስነመለኮት ተከሽኖ የቀረበ በመሆኑ ለመላው ምእመን መድረስ ስላለበት አቅረብንላችኋልና በጽሞና አዳጡት።

 

ምኩራብ (Mekurab) በዘመናችን ቤተክርስቲያን ያጋጠማትን ችግር የዳሰሰ ጥልቅ ትምህርት!(Video)

ምኩራብ (Mekurab) በዘመናችን ቤተክርስቲያን ያጋጠማትን ችግር የዳሰሰ ጥልቅ ትምህርት!

በካንሳስ ደብረ ሣህል መድኀኔዓለም ቤተ ክርስቲያን፤ የካቲት 27 ቀን 2009 ዓ/ም ጾመ ኢየሱስ በገባ በሶስተኛው እሁድ የምኩራብ እለት ከቀሲስ አስተርአየ የቀረበ ትምህርት ነው።
የሳምንቱ ምንባባችን በክርስቶስ፤ በአይሁድና በሐዋርያት መካከል የተካሄዱትን ውዝግቦች አካተው የያዙ ናቸው። ውዝግቦች የተካሄዱትም በምኩራብ ውስጥ ነው። ይህ የምንቀበለው ሳምንት በምኩራብ የተሰየመውም በዚህ ምክንያት ነው። የጾምና ጸሎት ወቅት ባካባቢያችንና በሩቅ የምንሰማውን ካለፈው ከኛ በፊት ከተካሄደው ጋራ በማነጻጸር፤ በመርመር፤ እየታዘብን የሚታረመውን ለማረም፤ የሚጥቅመውን ለመጠበቅ ነው። የሳምንቱ ጸሎታችንም መመስረት ያለበት ውዝግቦችን በምንመረምርበት ዛሬ በተነበበው ወንጌል ነው። ወንጌሉን የምንተረጉመው በሐዋርያት ትምህርት በኦርቶዶክሳውያን ሊቃውንት በእነ ቅዱስ ዮሐንስ አፈወርቅ ስብከት፤ ከዚያም በራሳችን ሊቃውንት አባቶቻችን ቅኔ ነው።
ባለንበት ዘመን በራሳችን፤ ባካባቢያችን፤ በደብራችን በአገራችን የኦርቶዶክስ ተዋህዶ ክርስትና የማይፈቅደው በጳጳሳት በቀሳውስት በዲያቆናት በመነኮሳት በቆሞሳት ስም የሚፈጸሙ ወደ ቤተ ክርስቲያናችን ሰርገው የገቡትን መታረም የሚገባቸውን እንመልከት። ባጭሩ ለመጠቆም፦
በምኩራብ መካሄድ የማይገባቸው የተለያዩ የንግድ ቆሳቁሶች እንደገቡ፤ በቤተ ክርስቲያናችን መከሰት የሌለባቸው ድርብርብ ነገሮች፦
1ኛ፦ የተደራረቡ የቅጽል ስሞች
2ኛ፦በተለይ በውጭ ዓለም ባሉ አብያተ ክርስቲያናት ህንጻ ድርብ እየተባሉ የሚነገሩ ጽላቶች።
3ኛ፦በዝሙት በዘረፋ የሚወቀሱት ጳጳሳት መነኮሳት ቀሳውስት ያላንዳች ሀፍረት በድፍረት በቤተ መቅደስ አገልግሎት መሰለፋቸው።
4ኛ፦ መታረም ይገባል ከሚሉት ሰዎች ጋራ ከመተባበር ይልቅ፤ እንዲቀጥል የሚተባበሩ፤ ይ ታረም የሚለውን ድምጽ ለማፈን የሚተግሉት ሰዎች፤ የእምነት የታሪክ ጠላቶች ለሀገር ለእምነት ለታሪክ ለትውልድ ቀቅለው የበሉ፤ ከሚካሄደው የኃጢአት ዝቅጠት ትርፍ በመሸመት ላይ ያሉ፤ ለግል ጊዜአዊ ደስታ ብቻ ሲሉ፤ ክርስቶስን ይህን ስህተት ለመቃወም ስልጣን ማን ሰጠህ እያሉ እንደታገሉት፤ በዘመናችንም ይታረሙ ከሚሉት ጋራ ተሰልፈው መታረም የሚገባው እንዲታረም ከመታገል ይልቅ የሚተባበሩት ተከስተዋል። የመከራው ዘመን እንዲራዘም የሚመኙ ናቸው። ክርስቶ በአይሁድ ከሰነዘረው ከመድ ጅራፍ፤ እጅግ የበለጠ የእሳት ጅራፍ እንደሚጠብቸው በአጽንኦ ያስገነዝባል ፤ ቪድዮውን ይመልከቱ

“ጽድቅን ለመፈጸም ክርስቶስ ተጠመቀ” በቀሲስ አስተርአየ ጽጌ (Video)

“ጽድቅን መፈጸም ይገባናል” በሚል ርዕስ ከ10 ዓመታት በፊት ቀሲስ አስተርአየ ጽጌ  ያቀረቡትን ጦማር መልሰን ጥምቀትን ለሚያከብረው ህዝብ እንድናቀርብ በመጠየቃችን አቅርበነው ነበር። በዚህ ዓመት በከንሳስ መድኃኔዓለን ቤተ ክርስቲያን በዓውደ ምህረት ላይ አቅርበውታል። ያቀረቡትን ትምህርት ቤተ ክርስቲያኑ በቪዲዮ  ቀርጾታል። ትምህርቱ ኢትዮጵያ የተጓዘችበትንና አሁንም ያለችበትን ክርስቲያን፣ሙስሊምና ቤተ-እስራኤል ለሆነው ሁሉ ስለሚያሳይ ለህዝብ ለቀነዋል።

ቀሲስ አስተርአየ ያቀረቡት “The Cross and the River” በሚል ርእስ Professor Haggai Erlichና የመሳሰሉት የታሪክ ምስክሮች “ This unique legal tolerance blended well with abstract concept of Ethiopia as embodiment of humanistic justice; a country accepted and praised, even though it was non-Islamic. (25)  እያሉ ላቀረቡት ምስክርነት በጥምቀት በዓል የምናጸባርቀው መሰረት እንደሆነ የነገሩን ለሰባዊ ፍትህ ርትዕ፤ ቤተ ክርስቲያኗ ለራሷ ህዝብና ለውጭው ወራሪዎች ስትገስጽበት ስትመሰክረው መኖሯን መስክረዋል።

Haggai Erlichና ሌሎችም ደራስያን ” Muhamed had respect for the monotheistic culture of Ethiopia, and he problaly even knew  some Geez words. He told his follwers;  “If you go to Abyssinia you will find righteousness  where God will give you relief from what you are suffering”(23-24) እንዳሉት፦ ሰው ሳይገሉ የሰው ንብረት ሳይዘርፉ፤ በሃይማኖቶቻቸው  ብቻ በራሳቸው ህዝብ  ለግድያ  አረቦች ሲሳደዱ፤ ኢትዮጵያውያን አባቶቻችን  ያቀፏቸው፤  ክርስቶስ “ጽድቅን መፈጸም ይገባል” ሲል ያወጀው  ከህገ አራዊትና ከህገ ኦሪት  የበለጠችው ቅድስና ህገ ልቡናቸው  ከ“humanistic justice” ጋራ በማዋሀዳቸው  ነበር።

ስለዚህ በዚህ ወቅት ይህን ብንመለከተው የነገረ መለኮቱን መሰረት ብቻ ሳይሆን ሁላችንም ኢትዮጵያውያን በጥሞና ብናዳምጠው የሚጠቅም ስለሆነ  ቀሲስ አስተርአየ በዚህ ዓመት በአውደ ምህረቱ ያቀረቡትን፤ በኢትዮጵያ ኦርቶዶክስ ተዋህዶ ቤተ ክርስቲያን  የተጠመቅን ብቻ ሳንሆን አገራችን የተጓዘችበትን ረዥም የዘመናት ጉዞ በያመቱ የምናከብረው የጥምቀት በዓል የሚያስታውሰን የሚያሳስበንና ያለንበትንም ዘመን አካቶ ስለሚያሳየን አቅርበንላችኌል።

1 2